Surat ka 33 Al Ahzab ayat 59 maréntahkeun sangkan kaum mu’minat nutup orat:
- Yeuh Nabi, béjakeun ka garwa-garwa anjeun jeung ka barudak awéwé anjeun jeung ka pamajikan-pamajikan jalma iman: “Arinyana kudu ngarungkupkeun jilbabna pikeun nutupan sakujur awakna.” Éta téh supaya arinyana babari katangén ku kituna maranéhna moal diganggu. Jeung Alloh mah Maha hampura tur Maha welas.
Raksukan muslimah kiwari kaasup prah, jadi kagaliban di mana-mana, di lembur atawa di dayeuh, keur somah nya kitu deui kusumah. Kaayan anu tangtu disyukuran ku sararéa. Opat puluh taun kalarung kaayaan kacida béda boh sacara modis nya kitu deui politis. Malah busana muslimah can pati akrab keur aktivist Organisasi Kemasyarakatan Pemuda Islam ogé boh anu independén (PII, HMI jeung GPI) atawa otonom Ormas Islam (IPNU, PMII, GP Anshur; IPM, IMM Pemuna Muhammadiyah; SEPMI, SEMMI, Pemuda Muslim; Gerakan Pemuda AlWashliyah jrrd.) Upama aya ogé anu maké tiung, saukur karémbong panjang anu dibeulitkeun sanyangsangna. Anu sapopoé marake pakéan nutup kaasup tiungna anu merenah ukur barudak Ummahatul Ghod jeung Pemudi Persis, bajuna nutup tiungna howas.
Masing-masing Organisasi miboga sajarahna masing-masing ngeunaan révolusi pakéan anggota awéwéna. PII – Pelajar Islam Indonnsia, mitembeyan urusan jilbab taun 1979. Bahasan Jilbab dipedar dina Advanced Leadership Training di Kampung Rongga Désa Cihampélas Kecamatan Cililin Kabupatén Bandung. Dumukna pisan di Pasantrén Pa Uwés Allohu yarham.
Lajuning laku bahasan dina Training, diteruskeun ku ngayakeun Diskusi Panél PII Wati ngeunaan Busana Muslimah, dina bulan Maret taun 1980 di SMA Muhammadiyah Cimahi, di Cibabat. Anu jadi Panélis harita nyaéta ti Pamaréntah, ti kalangan Akademisi, Mubaligh jeung aktivist. Representasi Pamaréntah, ti Kanwil Depag anu hadir Drs. Ali S Husen (Kasi Pena) jeung ti Kanwil Dept. Pendidikan dan Kebudayaan Kepala Bagian PGM-Pembinaan Generasi Muda. Representasi akademisi dokter Rahman Ma’as sareng dokter Tuti Suparti O Wiharja, sulur kalangan da’wah: Ibu H. Rogayah sareng Ibu Djumingan ti Aisyiyah Kab. Bandung. Panélis ti Aktivist Anéng Fauziyah Rusyad sareng Dadan Dania. Masing-masing Panélis medar sawidangna-sawidangna. Ti pamaréntashan mérélékeun urusan régulasi; dokter Rahman sareng dokter Tuti urusan hygienisna; Mubalighoh nu dua ngabahas ngeunaan hukum syara; aktivist ngajukeun makalah Nilai-nilai Etis dan Estetis Busana Muslimah.
Anu hadir dina éta diskusi panél nyaéta Pingpinan OKP Islam tingkat Provinsi, Utusan OSIS Sakola satingkat SMA-Aliyah sa Bandung Raya, Pingpinan Korda PII Wati sa Jawa Barat. Salah sahiji kacindekan nyaéta busana muslimah dicobaterapkeun jadi model seragam sakola. Sakola anu ngalalanyahan nerapkeun wajib seragam busana muslimah di Kota Bandung diantarana: Persekolahan Darul Hikam jeung PGII, di Kabupatén Bandung persekolahan Bina Muda Cicaléngka.
Anu sosialisasi Seragam Sakola busana muslimah henteu ukur PII tapi ogé organisasi séjén kaasup remaja masjid. Taun 1981 gerakan seragam sakola busana busana muslimah beuki narékab. Pamaréntah jaman harita ningali gerakan seragam busana muslimah lain tina urusan ibadah anu miwanda ajén inajén etis, higienis jeung estetis tapi leuwih kana kacurigaan politis. Kukituna seragam sakola anu modelna busana muslimah, di sakola negeri dihulag. Siswi dititah milih: Muka jilbab atawa pindah sakola. Nya ti harita jadi ramé.
Bancang pakéwuh ngeunaan jilbab di sakola mimiti rerep taun 84, ti harita barudak sakola teu dicarék maké jilbab, taun 1988 jumlah murid awéwé sakola negeri anu maké Jilbab mimiti nengah. Di Masyarakat salian ti remen aya fesyen show Busana Muslimah ogé Otlét-otlét busana muslimah sareng buku-buku ngeunaan busana muslimah mimiti rempeg. Disainer busana muslimah anu mimiti ngahanjatkeun modelna ka luhureun cat walk diantarana Nenet Puspatriani Bin Atang Ruswita, Aneu Rufaidah, Erni dll. Di kalangan artis diantarana aya Ida Royani jeung Iin Parlina. Kiwari maké pakéan muslim geus ilahar. Pilihan modeu kacida ragemna.
