Kiwari.co.id – Poé Kamerdékaan Republik Indonesia dipiéling saban tanggal 17 Agustus. Aya réa pihak anu milu andil dina merjoangkeun kamerdékaan ieu nagara.
Teu saukur pahlawan jeung tokoh politik, maranéhna anu boga profesi minangka jurnalis ogé mibanda peran penting di momen kamerdékaan RI.
Salah saurang inohong pers anu mibanda jasa nyaéta Herawati Diah. Tanpa dirina, naskah teks Proklamasi Kamerdékaan RI moal nepi kana leungeun wartawan asing di nagara séjén.
Unikna, Herawati ngarasa jasana anu gedé éta teu sabaraha mun seug dibandingkeun jeung jasa pahlawan séjénna. Inyana kalah ngarasa éra.
“Setiap peringatan 17 Agustus ada perasaan malu bagi saya. Banyak sahabat, kerabat dan orang Indonesia saat itu berjuang bertaruh nyawa, sedangkan saya hanya menerjemahkan teks proklamasi ke bahasa Inggris dan Belanda untuk disiarkan teman-teman pers asing,” pokna sakumaha dicutat ti Antara News.
Ieu sababaraha fakta ngeunaan Herawati Diah, sang panarjemah teks Proklamasi Kamerdékaan RI:
1. Nimba élmu jurnalisme
Herawati Diah nyaéta wartawati anu narjemahkeun teks Proklamasi Kamerdékaan RI. Inyana gumelar dina 3 April 1917 tur mangrupakeun anak katilu ti opat sadulur.
Indungna, Siti Alimah binti Djojodikromo digedékeun di lingkungan gegedén anu nekenkeun pangdidikan Islam jeung tradisi Indonesia.
Samentara éta, bapana nyaéta Radén Ratip anu mangrupakeun lulusan sakola dokter Stovia taun 1908 tur jadi ahli medis di pausahaan tambang timah Belanda.
Ngalansir ti Antara News, Herawati Diah ngalampahan pangdidikan di American High School di Tokyo, Jepang sanggeus lulus ti Europeesche Lagere School (ELS) Jakarta. Inyana satuluyna neruskeun pangdidikan ka Amerika Serikat (AS).
Dina taun 1941, inyana jadi wanoja Indonesia munggaran anu meunang ngahontal sarjana ti luar nageri. Herawati Diah lulus ti Barnard College, Universitas Columbia, New York tur kungsi ngulik élmu jurnalistik di Universitas Berkeley, California.
Harita, Herawati milih AS minangka tempat nimba élmu tina pangaruh indungna. Ibuna amanat sangkan Herawati ngulik élmu di nagara anu teu boga jajahan.
Tersjun ka dunya jurnalisme ngajadikeun Herawati Diah raket jeung rupa-rupa paristiwa sajarah ngagayuh kamerdékaan Indonesia. Hal éta pisan anu mawana nepi ka pancén narjemahkeun teks Proklamasi Kamerdékaan RI.
2. Narjemahkeun teks Proklamasi Kemerdekaan RI
Sanggeus Jepang serah bongkokan tur Soekarno-Hatta ngadeklarasikeun kamerdékaan RI, Herawati Diah sempet jadi sekretaris pribadi menteri luar nageri munggaran RI, Mr. Achmad Soebardjo.
Harita, Hera meunang naskah Proklamasi Kamerdékaan RI ti batur sasama wartawan nyaéta Burhanuddin Muhammad Diah anu ngawinna dina 18 Agustus 1942. Salaki Hera meunang naskah rancangan proklamasi tulisan leungeun Soekarno.
“Naskah draft itu sempat diremas dan dibuang Bung Karno setelah Bung Sajuti Melik mengetik naskah asli Proklamasi Kemerdekaan Republik Indonesia. Suami saya mengambil naskah draft itu, dirapikan dan diselipkan ke buku catatan yang dibawanya,” implengna Hera.
“Keesokan hari saya mendapati naskah itu, dan was was saat menerjemahkan sambil menyampaikan ke teman-teman wartawan asing, setelah Bung Karno membacakan teks bersejarah berdirinya Republik Indonesia,” sambungna.
Banner Poé Kamerdékaan ka-79
Sanggeus narjemahkanana, Herawati nyebarkeun tarjemahan teks Proklamasi Kamerdékaan RI ka pers luar nageri. Mangsa ngalakukeunana, inyana meunang bantuan ti salakina katut kanca sajawat pers kaasup Adam Malik.
Herawati tetep ngaleukeunan dunya jurnalisme sanajan salaki diistrénan minangka pajabat tur nempatan posisi penting minangka duta besar nepika Menteri Penerangan RI.
Herawati tetep leukeun maca jeung nulis media massa bahasa Indonesia pon kitu asing nepika ahir hayatna.
Herawati tilar dunya dina 30 September 2016 dina umur 99 taun.
3. Muncul di Google Doodle
Dina 3 April 2022, Google Doodle mintonkeun ilustrasi Herawati Diah. Éta banner mintonkeun tilu potretna ti mangsa ka mangsa.
Dina potret kahiji, Herawati Diah digambarkeun minangka tangtungan sarjana anu kakara lulus tur ngahontal gelarna. Satuluyna, potret kadua mintonkeun Hera anu geus jadi jurnalis lemah cai.
Potret katilu mintonkeun Herawati Diah anu geus kolot tur méakeun mangsa kolotna ku nulis. Ngalansir ti detikcom, Google mintonkeunana dina raraga miéling milangkala Herawati anu ka-105.
Ropéa basa: Agus Rohmat
Ti sababaraha sumber
