Kiwari.co.id – Dina mangsa para pamancén pemadam kebakaran bajoang ngalawan kahuruan leuweung di California Kidul téh, sumebar foto-foto pesawat anu keur ngaragragkeun bubuk beureum jeung kayas di pasisian dayeuh Los Angeles.
Bubuk kalayan warna moronyoy éta téh kiwari nyimbutan jalan-jalan, lemah, suhunan imah, katut mobil.
Para pajabat nyaturkeun rébuan galon bahan kimia éta téh diragragkeun dina minggu kalarung keur ngeureunkeun sebaran seuneu.
Naon sabenerna kandungan zat éta téh jeung kumaha pangna bisa ngabantu mareuman kahuruan leuweung téh?
Zat naon anu beureum jeung kayas tur ditebarkeun?
Bahan kimia tahan seuneu éta téh taya lian produk Phos-Chek tur dijual ku pausahaan Perimeter.
Zat ieu téh geus digunakeun pikeun mareuman seuneu di Amerika Serikat ti saprak taun 1963. Departemen Kehutanan jeung Perlindungan Kebakaran California makéna minangka pangharung kahuruan.
Malahan mah, zat éta téh mangrupakeun pangharung seuneu anu pangréana dipaké di dunya, nurutkeun laporan Associated Press taun 2022 mah.
Kahuruan leuweung anu niban California Kidul salila saminggu ahir ieu katut foto-foto anu némbongkeun bubuk beureum kayas nutupan kandaraan jeung jalan-jalan marunculan di media sosial.
Perimeter, pausahaan di satukangeun Phos-Chek téh, saméméhna geus nyarankeun pikeun sagancangna meresihan éta bubuk sanggeus ditétélakeun aman.
“Semakin lama bahan penghambat mengering, semakin sulit untuk menghilangkannya,” ceuk pausahaan ngawawadianan.
Sumber gambar: Getty Images
Dijieun tina naon éta zat jeung naha warnana beureum jeung kayas?
Formula kimia produk Phos-Chek téh teu dipiweruh ku balaréa, ngan pausahaan éta mah saméméhna nétélakeun yén ieu produk téh nyaéta tina 80% cai, 14% garam jinis pupuk, 6% zat pawarna tur panghalang korosi.
Anapon ngeunaan kelirna, Perimeter nyarita produk éta téh ngahaja dijieun kalayan warna moronyoy minangka “alat bantu visual pikeun pilot jeung pamancén pemadam kebakaran.”
Sanggeus sababaraha poé karérab ku cahya panonpoé mah, kelirna téh belél jadi warna taneuh, sambungna Perimeter.
Bahan kimia tahan seuneu ieu téh ilaharna disemprotkeun di sabudeureun lelewek leuweung anu kahuruan nyaéta vegetasi reujeung lahan anu rawan kahuruan pikeun ngeureunkeun panyebaran seuneu.
Nurutkeun Dinas Kehutanan AS, zat éta téh “menghambat laju penyebaran dengan mendinginkan dan melapisi sumber api, mengurangi oksigen dalam api, dan memperlambat laju pembakaran karena garam anorganik yang terkandung pada zat itu mengubah api agar tidak terus berkobar.”
Naon kontroversina?
Panggunaan bahan kimia ieu téh geus jadi kontroversi dina mangsa kaliwat lantaran potensi kana balukar anu ditimbulkeun dina lingkungan.
Gugatan hukum anu diajukan dina taun 2022 ku Forest Service Employees for Environmental Ethics, hiji organisasi ti pagawé Dines Kahutanan AS anu masih digawé kénéh katut anu geus pangsiun mah, nuding yén badan federal éta téh ngarempak undang-undang cai beresih ku miceun bahan kimia tahan seuneu éta ka leuweung ku pesawat.
Gugatan ieu téh nétélakeun yén bahan kimia éta geus maténi lauk tur teu efektif.
Dina taun 2023, saurang hakim Distrik AS satuju ka éta para karyawan, ngan dina putusanana mah ngidinkeun Dines Kahutanan pikeun terus ngagunakeun éta bahan kimia téh ku alesan keur ngupayakeun idin ti Badan Perlindungan Lingkungan AS (EPA).
Éta kasus téh narik panengetan masarakat anu ancur balukar kahuruan leuweung dina mangsa kalarung mah, kaasup dayeuh Paradise, California, anu ancur lebur gara-gara kahuran dina 2018.
Sumber gambar: Getty Images
Wali Kota na mangsa harita, Greg Bolin, muji putusan hakim kalayan nyaturkeun yén éta putusan téh nangtukeun masarakat “memiliki peluang untuk melawan” ketika menghadapi kebakaran.
Dines Kahutanan ngaiberan media NPR yén taun ieu, maranéhna téh ngeureunkeun hiji jinis formula Phos-Chek nyaéta Phos-Chek LC95 tur ngagantina ku nu séjén MVP-Fx kalayan nyebutkeun yén zat anu langakhirna téh teu ngandung acun teuing keur sato jarah mah.
Dines Kahutanan ogé ngalumakukeun pangcaraman wajib pikeun ngaragragkeun bahan kimia ieu téh di area lingkungan anu sensitif, kayaning parairan jeung habitat spesies anu kaancam tumpur.
Ngan aya pangiwalan kana pangcaraman éta téh, nyaéta “ketika nyawa manusia atau keselamatan publik terancam”.
Ropéa basa: Agus Rohmat
Sumber: BBC
