Kiwari.co.id – Salila milampah ibadah puasa Ramada mah, réa umat muslim anu jadi babari tunduh. Hal ieu téh tangtu bisa ngaganggu aktivitas sapopoé, ti mimiti tina gawé nepi ka diajar.
Tah ku kituna, sajumlah jalma mah miyakin lamun munculna rasa tunduh mangsa puasa téh lantaran disababkeun ngonsumsi sangu mangsa sahur. Hal éta anu ngajadikeun sawaréh jalma nyingkahan sangu tur ngagantina ku karbohidrat lianna.
Ngan tétéla, geuning sangu téh lain nu jadi panyabab jalma babari tunduh salila puasa. Terus, naon atuh faktorna?
Panyabab Babari Tunduh Mangsa Puasa
Na mangsa sahur téh umat muslim disarankeun pikeun ngonsumsi kadaharan minangka sumber energi pikeun puasa. Ngan, sababaraha urang jalma mah milih teu dahar sangu mangsa sahur téh lantaran dianggap nyieun pitunduheun.
Padahal, sangu mah lain panyabab hiji jalma jadi babari tunduh mangsa puasa. Nyutat catetan detikHealth, dr Gaga Irawan Nugraha, SpGK nyaturkeun, faktor utama hiji jalma jadi babari tunduh mangsa puasa mah lantaran waktu saréna anu kacida saeutik sahingga mangaruhan kajagjagan.
“Orang yang ngantuk itu bukan karena kebanyakan makan nasi, tapi dia nggak bugar aja dan tidurnya terlalu larut,” ceuk dr Gaga sababaraha waktu kalarung ka detikcom.
Mangsa Ramadan mah, jam saré jalma mémang baris ngurangan tur béda ti sasari. Sabab, umat muslim téh kudu hudang sahur dina tabuh 03.00-04.00 janari, terus dituluykeun milampah ibadah salat Subuh dina tabuh 05-an.
Sanggeus éta téh sabagian jalma mah baris nuluykeun aktivitas ku miang ka kantor atawa indit ka sakola, sahingga teu boga waktu pikeun saré deui sanajan ukur sakedapan ogé. Tah, ku alatan kurangna waktu saré éta anu ngajadikeun gampang tunduh mangsa puasa téh, utamana dina wanci isuk atawa beurang.
Leuwih jauh, dr Gaga téh ngélingan sangkan pinter-pinter ngatur waktu saré dina mangsa peuting tepika waktu hudang sahur. Pikeun nyegah tunduh dina mangsa beurang, hadéna mah saré téh leuwih awal dina wanci peuting sangkan boga waktu reureuh anu cukup.
“Sebenarnya saat Ramadan itu memang tidur akan kurang, apa lagi ibu-ibu biasanya bangun jam 2 atau 3 (pagi) untuk siapin makan sahur. Ya, pasti akan ngantuk. Pintar-pintar atur waktu tidur aja dan olahraga,” pokna.
Tips Tetep Jagjag Mangsa Puasa
Salian ngatur jam saré téh, aya sababaraha cara séjén sangkan awak tetep jagjag mangsa puasa. Dilansir situs Cleveland Clinic Abu Dhabi, ieu sajumlah tipsna:
1. Olahraga
Salila puasa Ramadan téh réa jalma anu kalah wegah pikeun olahraga. Padahal mah, olahraga téh bisa ngabantu waruga tetep séhat tur jagjag mangsa puasa.
Sok sanajan kitu, singkahan aktivitas fisik anu beurat teuing lantaran dihariwangkeun ngajadikeun awak dehidrasi jeung leuleus. Pilih olahraga anu énténg atawa sedeng tur hadéna mah dilakukan mangsa soré atawa peuting sanggeus buka puasa.
Aktivitas olahraga bisa dilakukeun salila 20-30 menit sapoé. Anapon jinis-jinis olahraga anu bisa dilakukeun mangsa puasa téh, kayaning jogging, leuleumpangan, sapédah, jeung aerobic énténg.
2. Asupan Protein anu Saimbang mangsa Sahur
Mangsa sahur téh, alusna mah pilih kadaharan nu ngandung gizi saimbang sangkan waruga tetep jagjag sarta ngabantu ngajaga kaséhatan padaharan. Kombinasi karbohidrat kompleks, protein, lemak, serat, buah, jeung sayur-sayuran bisa ngajaga waruga tetep fit.
Tuluy, singkahan kadaharan asin atawa goréngan di waktu sahur. Alusna mah, ganti ku kadaharan kayaning roti gandum weteuh, sangu beureum, endog alpuket, atawa cau. Puguhkeun ogé ngonsumsi cai anu cukup sangkan nyunponan cairan poéan waruga.
3. Atur Suhu Rohangan sangkan Tetep Seger
Tips satuluyna mah nyaéta ngatur suhu rohangan sangkan tetep seger. Mangsa kondisi cuaca keur panas mah jalma téh leuwih babari késangan tur bisa jadi lungsé.
Pastikeun anjeun mibanda kipas angin atawa AC di jero rohangan sangkan awak karasa seger. Tong poho mandi mangsa isuk jeung soré sangkan awak tetep seger.
Ropéa basa: Agus Rohmat
