Jakarta, Kiwari.co.id — Menteri Energi jeung Sumber Daya Mineral (ESDM) Arifin Tasrif buka sora sual rancana bahan bakar minyak (BBM) jinis Pertalite dipupus dina 2024.
Inyana ngaku teu masalah kana éta rancana asalkeun PT Pertamina (Persero) bisa ngahasilkeun produk tanpa beban tambahan.
“Ya kalau memang bisa disediakan dengan tidak ada beban tambahan, boleh aja,” katanya di Kementerian ESDM, dikutip detikcom, Senén (15/1).
Pertamina ngusulkeun sangkan mimiti taun ieu mah teu ngajual BBM anu kadar oktanna (RON) di sahandapeun 91, sahingga mupus Pertalite anu spesifikasina dina mangsa ayeuna RON 90. Kaputusan ieu sakaligus nandeskeun Pertamina usik milu aturan standar emisi Euro 4 ti pamaréntah.
Direktur Utama Pertamina Nicke Widyawati nyaturkeun sanggeus Pertalite dipupus, pausahaan pelat beureum ieu baris ngagantina ngagunakeun produk anyar RON 92.
Produk éta téh nyaéta Pertamax Green 92 anu mangrupakeun campuran antara RON 90 (Pertalite) jeung 7 persén Bioetanol (E7).
“Oleh karena itu, 2024 mohon dukungan kami akan keluarkan lagi Pertamax Green 92. Sebetulnya, ini Pertalite kita campur dengan etanol, naik oktannya dari 90 ke 92,” pokna, Rebu (30/8).
Pertamina geus medalkeun Pertamax Green 95 dina taun kamari. Ieu téh nyaéta campuran antara Pertamax jeung 8 persén etanol.
Ceuk Nicke deui, ku paluncuran dua produk anyar ieu mangka mimiti 2024 produk BBM bensin Pertamina ngan tinggal tilu, nyaéta Pertamax Green 92, Pertamax Green 95 jeung Pertamax Turbo. Tiluanana geus luyu aturan Euro 4 anu lumaku pikeun mobil-mobil bensin anu dijual di Indonesia saprak taun 2018.
Kontributor – Agus Rohmat
Ropéa Basa – RB
