WASHINGTON DC, Kiwari.co.id – Presiden kapilih AS Donald Trump baris ngaluarkeun paréntah eksekutif sanggeus diistrénan pikeun ngeureunkeun program-program karageman, kasataraan, jeung inklusi. Iber ieu diungkab ku saurang pajabat Gedung Putih dina Senén (20/1/2025), sakumaha dilansir Reuters.
Nurutkeun éta pajabat, Trump ogé baris netepkeun yén pamaréntah federal Amerika Serikat saukur baris ngaku dua jinis kelamin, nyaéta lalaki jeung awéwé.
Pajabat Gedung Putih éta nyaturkeun deui, bakal leuwih réa tindakan kakait program karageman, kasataraan, jeung inklusi diharepkeun sagancangna dilakukeun. Ngan, inyana teu méré wincikan lian ngeunaan léngkah-léngkah anu dirancanakeun atawa iraha baris dibéwarakeun.
“Sebagai bagian dari perintah eksekutif, dana federal tidak akan digunakan untuk mempromosikan ‘ideologi gender’,” ceuk éta pajabat.
Ideologi gender ngarujuk kana istilah anu remen digunakeun keur ngarujuk kana ideologi naon baé anu ngapromosikeun kamandang non-tradisional ngeunaan seks jeung gender.
“Pendanaan AS juga tidak akan digunakan untuk prosedur medis transisi,” pokna deui.
Teu sagancangna jéntré naon hartina éta paréntah eksekutif pikeun militer AS. Ngan, dina mangsa jabatan munggaranna, Trump kungsi ngabéwarakeun yén inyana bakal nyaram tentara transgender pikeun mancén di militer, katut pamaréntahanana ngabekukeun parékrutan personel transgender. Joe Biden satuluyna ngabedokeun éta kaputusan nalika inyana ngajabat minangka Presiden AS mimiti 2021.
Dua paréntah eksekutif ngeunaan karageman, kasataraan, jeung inklusi, sarta masalah gender tayalian bagian tina saruntuyan paréntah ngeunaan sababaraha jejer mimiti tina imigrasi nepi ka energi anu dipratinjau ku para pajabat Gedung Putih anu anyar dina Senén isuk. Istrénan Trump sorangan satadina baris diayakeun dina Senén tabuh 12.00 waktu satempat atawa Senén tengah peuting WIB.
Sumber: Reuters
Ropéa basa: Agus Rohmat
